前幾日同大家分享完大地之子體驗左一年工作生活先升大學。可能因為郵差叔叔的工作太艱辛，大地之子升左大學之後就無再返過工，佢話想專注喺佢嘅學業之上。離鄉別井去到丹麥，一讀就讀左五年書。咁呢五年唔打工的大地之子生活費點算呢？佢的回答令我😮左嘴。
「政府會每個月畀零用錢每個學生。」
無錯，法羅群島嘅教育福利都係好好架。首先，如果你留返喺法羅群島或者去到丹麥升學，所有學費全免！供到你上博士都無問題。咁如果我想去海外升學咁點算呀？無問題！政府會津貼海外留外生每年8萬蚊丹麥克朗的學費，大約10萬蚊港紙。學費已經唔使畀，仲要畀埋零用錢你洗添。扣稅後每個月大約6000港紙袋袋平安。等你可以專心於你嘅學業。唔可以準時畢業的朋友唔使擔心，零用錢出到你畢業為止😉唔止每個月的6000蚊，到暑假的時候，政府仲好貼心咁驚海外留學生無錢返法羅群島度假，會喺6月的時候發放Holiday money ，等學生有錢買機票返屋企或者去個旅行，真係做到study-life balance😌holiday money 由2500kr到5000kr不等，視乎讀書的地點而定。
咁當你過左五年愉快學習生活之後，社會大學會唔會變成地獄呢？答案係唔會架！法例規定所有有全職工作的人每年都要有5星期的有薪大假。仲會每年五月發放等於一年薪金的1.5%作為holiday money☺️咁如果失業又點算呢？原來當你有野做的時候，稅項的1.25%會交去「失業救濟金」，當有人失業的時候，政府就會喺入面出糧畀失業嘅人啦，大約有一萬蚊港紙。
除左福利好，呢度好多制度都好人性化。例如大地之子仲讀緊書的時候，如果覺得自己未準備好考試，佢可以唔去考，直到佢覺得準備好為止，而唔會扣分。到佢做野啦，我從來未見過佢唔準時收工，而且從來唔會帶工事返屋企做。係，呢度人做事效率唔夠香港人高，但當地人已經習慣左慢活，咁快有金執咩，不如大家開開心心享受放工同屋企人相處的時間仲好啦，聽日再慢慢做!不過！福利咁好，當然有代價，呢度非常重稅，平均大約要交45%稅項，最高可以去到52%添架！超過收入一半！所以世上係無免費午餐的。
---------------------------------------------------
想睇更多法羅群島靚相？
請follow ig: whereisfaroeislands
https://www.instagram.com/whereisfaroeislands
Search